រថយន្តក្រឡុកស៊ីម៉ង់ត៍ក្រឡាប់ចូលផ្ទះប្រជាពលរដ្ឋ បណ្តាលឲ្យកិនក្មេងស្រីម្នាក់ស្លាប់ភ្លាមៗ
21-November-2019 | ដោយ ពលមនសិការ
ភ្នំពេញ៖ ក្មេងស្រីម្នាក់បានស្លាប់ភ្លាមៗយ៉ាងអាណោចអាធ័ម ក្នុងហេតុការណ៍គ្រោះថ្នាក់ចរាចរណ៍រថយន្តក្រឡុកស៊ីម៉ង់ត៍បុកចូលផ្ទះប្រជាពលរដ្ឋ។ ហេតុការណ៍គ្រោះថ្នាក់យ៉ាងរន្ធត់ខាងលើបានកើតឡើងនៅ ថ្ងៃព្រហស្បត្តិ៍ ១០រោច ខែកត្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២១ ខែវិច្ឆិកា ឆ្នាំ២០១៩ នៅវេលាម៉ោង១៣នឹង៤០នាទី ស្ថិតនៅផ្លូវបេតុង៥០ម៉ែត្រ ស្ថិតក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ។
លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានឲ្យដឹងថារថយន្តបង្កម៉ាក HINO ពណ៌ក្រហមស ពាក់ស្លាកលេខ ភ្នំពេញ 5A-1448 បើកបរដោយឈ្មោះ ភ្លូ ឆាង ភេទប្រុស អាយុ២០ឆ្នាំ មុខរបរបើកបររថយន្ដ មានទីលំនៅភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ (ឃាត់ខ្លួន )។ ចំណែកម្ចាស់ផ្ទះឈ្មោះបង វុត្ថា ភេទប្រុស អាយុ៣២ឆ្នាំ មុខរបរជាងម៉ូតូ ស្នាក់នៅភូមិប្រកា សង្កាត់ព្រៃស ខ ណ្ឌដង្កោ រាជធានីភ្នំពេញ(ពុំមានរងរបួស)។ ក្មេងស្រីរងគ្រោះឈ្មោះ វង សុនិតា ភេទស្រី អាយុ៤ឆ្នាំ មុខរបររស់នៅក្នុងបន្ទុកឪពុកម្តាយ(ស្លាប់នៅកន្លែងកើតហេតុ)។
លោកអធិការបន្តថា មុនពេលកើតហេតុរថយន្តបើកបរពីជើងទៅត្បូង ពេលមកដល់ចំណុចកើត ហេតុរថយន្តបើកបរលឿនរួចបានឡើងវ៉ាស្តាំរថយន្តដែលនៅពីមុខមិនផុតក៏ជាន់ហ្វ្រាំងក្រឡាប់ចូលផ្ទះកិនក្មេងតែម្តង។
លោកអធិការនគរបាលខណ្ឌដង្កោបញ្ជាក់ថា មូលហេតុបណ្តាមកពីរថយន្តបើកបរលឿនខ្វះការប្រុងប្រយ័ត្ន។ បច្ចុប្បន្នគ្រោះថ្នាក់ចរាចរណ៍ខាងលើត្រូវបានប្រគល់ឲ្យការិយាល័យនគរបាលចរាចរណ៍ផ្លូវគោករាធានីភ្នំពេញ ៕
ចំនួនអ្នកទស្សនា
- ថ្ងៃនេះ3051
- ម្សិលមិញ20231
- សប្តាហ៍នេះ82131
- ខែនេះ104011
- ឆ្នាំនេះ104011
- សរុប20546467